Tarixi qardaşlıq, ortaq türk kimliyi, oxşar mənəvi və mədəni dəyərlərə, ənənələrə əsaslanan Azərbaycan-Qazaxıstan münasibətləri günümüzdə əsl strateji tərəfdaşlıq və müttəfiqlik xarakteri daşıyır. Münasibətlərimizin diplomatik çərçivələri aşaraq türk birliyi ideyasına, qarşılıqlı etimada və dərin inteqrasiyaya söykənən çoxşaxəli strateji tərəfdaşlıq səviyyəsinə yüksəlməsində iki ölkənin liderlərinin fəal və konstruktiv dialoqu əsas rol oynayır. Azərbaycan Prezidenti İlham Əliyevin və Qazaxıstan Prezidenti Kasım-Jomart Tokayevin qarşılıqlı səfərləri, xüsusilə son üç ildə müşahidə olunan intensivlik aktual məsələlərin operativ şəkildə həllinə, ortaq mövqelərin formalaşdırılmasına və əməkdaşlıq gündəliyinin irəli aparılmasına geniş imkanlar açır.