1 iyun - Uşaqların Beynəlxalq Müdafiəsi Günü münasibətilə tədbir və bayram konserti keçirildi.
01.06.2024-cü il tarixdə Azərbaycanımızın dilbər guşələrindən olan Astara rayonunda rayon icra hakimiyyətinin tərəfdaşlığı ilə Hamoşam inzibati ərazi vahidliyində 1 iyun - uşaqların Beynəlxalq Müdafiəsi Gününə həsr olunmuş "Sevək Azərbaycanı" adlı tədbir və bayramı konserti keçirildi.
Bayram tədbiri təşkilatçı - prodüsser Lalə Dadaşovanın, "Nur Organization"- nun rəhbəri Kamran Nurun, "Əkinçi" TEST İB - nin təsisçisi Emin Hacısoy TürkƏrin, "Mübarizlər" İB - nin sədr müavini Gülnar Nəsiblinin birgə təşkilatçılığı ilə baş tutdu.
Tədbir təşkilatçı Lalə Dadaşovanın başlatdığı "Bir zərrənin sevinci" adlı xeyriyyə marafonu çərçivəsində, aparıcı Əmanət Fərəcqızının təqdimatı ilə Azərbaycan Respublikasının dövlət Himni səsləndirildi və şəhidlərin ruhu bir dəqiqəlik sükutla yad edildi.
Tədbirdə ilk olaraq Astara rayonun Millət vəkili Rəşad Mahmudova söz verildi. Rəşad müəllim öz növbəsində, tədbir iştirakçılarını salamlayaraq, bayram münasibətilə körpə fidanları təbrik etdi. Hamoşam bələdiyyəsinin sədri Rüfət Əliyev də öz növbəsində tədbir iştirakçılarını salamladı. Təşkilatçılara təşəkkürünü bildirərək uşaqların bayramını təbrik etdi.
Bakıdan gəlmiş musiqili qonaqlar "Avaz 4" televiziya muğam müsabiqəsinin qalibi Duyğu Rüstəmova, Beynəlxalq Festivallar iştirakçısı Kamal Dadaşov, Beynəlxalq "Xarı Bülbül" müsabiqəsi iştirakçısı Xəyyam Qasımzadə və müsabiqələr qalibi rəqqasə Amaliya Ağayeva musiqi nömrələri ilə balaca fidanları sevindirdilər.
Bundan başqa, bayram konsertində yerli folklor nümunələri göstərildi. Tar dərnəyinin üzvü Çingiz Hacızadə, Hamoşam kənd klubunun rəqs dərnəyinin üzvləri Mələk Nəbizadə, Nuray Babazadə, Nərmin Babazadə, Gülay Cəbizadə, Ömər Cəbizadə çıxış etdilər. Motlayataq kənd klubunun Aşıqlar dərnəyinin rəhbəri, Aşıqlar Birliyinin üzvü aşıq Vaqif Rzayev, Diqoli kənd klubunun ailə ansanblı, aşıq Əbdüləzim Nəcəfov - zurnada, Eldar Nəcəfov - dəmkeşdə, Namiq Nəcəfov - nağarada, Şahin Nəcəfov - qoşa nağarada folklor nümunələri ifa etdilər. Astara Mədəniyyət Mərkəzində fəaliyyət göstərən "Hovəlim folklor" qrupu, Hamoşam və Toradi kənd tam orta məktəbinin rəhbərləri Ağayev İgid, Əliyev Səbuhi və məktəbin şagirdləri də konsert proqramında iştirak edirdilər. Bu çıxışlar Toradi kənd klub müdiri Sürəddin Əliyevin rəhbərliyi ilə hazırlanmışdı. Təşkilatçı Şahid Cövziyev, Hamoşam və Toradi kitabxana işçiləri Şahin Xankişiyev, Savalan Cəbiyev bayram konsertində iştirakçılar arasında idilər.
Könüllülər -"Əkinçi" TEST İB - nin üzvləri Nuranə İbrahimova, Şölə Məmmədova, Yamən Rəsulova uşaqları əyləndirərək, hədiyyələr təqdim etdilər. Şölə Məmmədova uşaqlara daha sıx münasibət göstərərək onlarla rəqs edirdi.
DİN - in sabiq polis polkovniki Şəfa Bəyalıyev tədbirdə xüsusi qonaq qismində iştirak edirdi.
Tədbirdə qonaq qismində Könüllü Yardım Fondunun üzvləri - Lənkərandan Elşad Həsənov, Astaradan Ələddin Ağayev və Cəlilabaddan Emil Mehdizadə də fəal iştirak etdilər.
20 şagirdə içi məktəb ləvazimatları ilə dolu məktəbli çantaları,10 nəfər yuxarı sinif şagirdinə müxtəlif hədiyyələr "Əkinçi" TEST İB tərəfindən təqdim olundu.
Tədbirin sonunda "Əkinçi" TEST İB - nin təsisçisi Emin Hacısoy uşaqlarla birlikdə simvolik "el bir olsa" şüarını səsləndirərək, tədbiri bağlı elan etdi.

Nüşabə Əhmədova



Yaşıl Dünya Naminə

02.06.2024-cü il tarixdə Ümumdünya Ətraf Mühitin Mühafizəsi günü ərəfəsində Astara Rayon İcra Hakimiyyətinin tərəfdaşlığı ilə "Əkinçi" TEST İB könüllüləri və astaralı könüllülər "Yaşıl dünya naminə həmrəylik ili" çərçivəsində dəniz sahili ərazidə təmizlik işləri apararaq "eko aksiya" keçirdilər.