Ümummilli Lider Heydər Əliyev XX əsrin ikinci yarısı və XXI əsrin əvvəllərində ölkəmizin tarixində mühüm rol oynamış dahi dövlət xadimi kimi illər keçsə də, hər zaman hörmət və ehtiramla anılacaq. Ulu Öndərin həm sovetlər dönəmində, həm də müstəqillik dövründə Azərbaycanın inkişafı və milli kimliyin formalaşması üçün göstərdiyi müstəsna xidmətlər qədirbilən xalqımız tərəfindən heç zaman unudulmayacaq.
Respublikamızın hər yerində olduğu kimi, Qazax rayonunda da Ulu Öndər Heydər Əliyevin anım gününə həsr olunmuş silsilə tədbirlər keçirilir.
Qazax Rayon İcra Hakimiyyəti, Qazax Rayon Heydər Əliyev Mərkəzi və Yeni Azərbaycan Partiyası (YAP) Qazax Rayon Təşkilatının birgə təşkilatçılığı ilə xalqımızın Ümummilli Lideri Heydər Əliyevin anım günü ilə əlaqədar “Azərbaycan tarixinin qürur səhifələrinə çevrilən ömür yolu” mövzusunda tədbir keçirilib.
Tədbir iştirakçıları əvvəlcə “Dahilər ölməz, əbədi yaşar!” başlıqlı kitab sərgisinə baxış keçiriblər.
Tədbirdə Azərbaycan Respublikasının Dövlət Himni səsləndirilib, Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib.
Ulu Öndərin həyat və siyasi fəaliyyətini əks etdirən “Dahi şəxsiyyət” filmi nümayiş olunub.
Qazax Rayon Heydər Əliyev Mərkəzinin direktoru Ceyhunə Hüseynova tədbiri açaraq bildirib ki, Heydər Əliyev Azərbaycanın ən yeni tarixinin yaradıcısıdır. O, öz həyatı və yorulmaz fəaliyyəti ilə xalq, el-oba, Vətən üçün yaşamağın, çalışmağın, mübarizə aparmağın əvəzsiz nümunəsini göstərərək nəsillərə örnək ola biləcək ömür yaşadı.
Rayon icra hakimiyyətinin başçısı Rəcəb Babaşov çıxışında müstəqil Azərbaycan dövlətinin qurucusu, həyatını xalqının və dövlətinin işıqlı gələcəyinə həsr edən Ulu Öndərin mənalı ömür yolundan, siyasi fəaliyyətindən geniş söz açıb.
Çıxış edənlər bildiriblər ki, xalqımız Ulu Öndər Heydər Əliyevin əziz xatirəsini həmişə uca tutur və dərin hörmətlə anır.
Tədbirdə Qazax şəhər Səlim Əfəndiyev adına 1 nömrəli tam orta məktəbin 10-cu sinif şagirdi Təhminə İsmayılova Ramiz Duyğunun “Karvan gedir”, Qazax Rayon Uşaq Gənclər İnkişaf Mərkəzinin dərnək üzvləri, Qazax şəhər Səməd Vurğun adına 2 nömrəli tam orta məktəbin şagirdləri Banu Səmədli və Əli Səmədli “Ulu bir sərkərdə, ulu bir Öndər”, “Bu xalq Heydər, bu xalq İlham deyir” şeirlərini səsləndiriblər.