“İdman insan həyatında önəmli yerə sahibdir. Fikrimcə, bu sahənin içində olmaq gözəl hissdir”.
Bu sözləri qadın voleybolçulardan ibarət Azərbaycan millisinin və “Azərreyl” komandasının kapitanı Aynur İmanova deyib.
İdmanın asan və çətin tərəflərindən söz açan təcrübəli oyunçu gənc nəslə sağlam həyat tərzi sürməyi məsləhət görüb: “İdmanla məşğul olduğun zaman müəyyən zədələr alırsan. Lakin bu məqamlarda ruhdan düşməməlisən. Çünki uğura gedən yolda müxtəlif çətinliklərlə qarşılaşmaq normal haldır. Kiçik yaşlı uşaqlar bu sahəyə gəldikdən sonra tez-tez fikirlərini dəyişirlər. Bu vaxt valideyn və məşqçinin dəstəyi çox önəmlidir, ancaq məcburiyyət olmadan. Əgər gözəl qamət, sağlam həyat və ən önəmlisi, ölkənin bayrağını dünya meydanlarında dalğalandırmaq istəyirsənsə idmanla məşğul olmalısan. Bu peşə həm sənin, həm də yaşadığın ölkənin tanınmağına kifayət qədər təsir edir. Düşünürəm ki, bundan gözəl duyğu ola bilməz”.
35 yaşlı blokçu voleybolla məşğul olmağı təsadüfən seçdiyini bildirib: “Əslində, müəllimin yanına başqa idman növü üçün getmişdim. Lakin mənə voleybolla məşğul olmağı tövsiyə etdi. Özümü bu idman növündə gördüm və davam etdirmək qərarına gəldim. Yeni başladığım dövrdən indiyədək voleybolda çox şey, xüsusilə düşüncə tərzi dəyişib. Məsələn, valideynlər artıq oğlanlarla yanaşı, qızlarını da idmana yazdırırlar. Əgər idmançısansa, gündəlik qidalanma və yuxu rejiminə fikir verməlisən. Peşəkar səviyyədə inkişaf etmək üçün bunlara əməl etmək vacibdir”.
Milli komandanın üzvünün fikrincə, Azərbaycanda voleybolun səviyyəsi ildən-ilə artır: “Artıq bölgələrdə kiçik yaşlı uşaqlar arasında seleksiya işləri aparılır, məşqçilər üçün seminarlar təşkil edilir və maraqlı layihələr həyata keçirilir. Şəraitimiz isə ideal vəziyyətə gətirilib. Məşq zalları təmir olunub, eləcə də digər lazımi avadanlıqlar gətirilib. Bu da inkişafa müsbət mənada təkan verir. Yadıma gəlir, mən gənc olarkən Valeriya Məmmədova, Oksana və Yelena Porxomenko bacıları bizə voleybolun sirlərini öyrədirdilər. Bəzən nəyisə düzgün etmədiyimiz zaman əsəbləşirdilər. Hazırda 35 yaşım var və onların niyə bu cür hiss keçirdiklərini indi yaxşı anlayıram. Bilirəm ki, həmin şəxslər gənclərin inkişafı üçün çalışırdılar. Çıxış etdiyim komanda da gənc oyunçular var. Mən də onların səhvlərini özlərinə izah edirəm”.
Qeyd edək ki, Aynur İmanova 2016-cı ildə Azərbaycan millisinin heyətində Avropa Qızıl Liqasının qalibi olub.