Artıq iqlim dəyişikliyi ilə mübarizə üzrə fəaliyyət və satınalmalar arasında müəyyən sinerji mövcuddur.
Bu barədə AİB-in İqlim Dəyişmələri və Dayanıqlı İnkişaf Departamentinin İqlim Dəyişmələri üzrə direktoru Noel O'Brayen Tbilisidə AİB-in illik toplantıları çərçivəsində keçirilən "Dayanıqlı satınalmalar - AİB-in iqlim dəyişmələrinin nəticələrinin yüngülləşdirilməsi və onlara adaptasiya üzrə hədəflərinin əldə olunmasına töhfə" mövzusunda panel müzakirəsində çıxışında deyib.
"Artıq müəyyən sinerji mövcuddur və bizim nöqteyi-nəzərimizdən potensial böyükdür. Daha önəmlisi, satınalmalara bu cür yanaşma sistem səviyyəsində dəyişikliklərin öhdəsindən gəlməyimizə imkan verir. Beləliklə, satınalma qərarları bu cür hədəflərə uyğun olduqda, dəyişikliklərə təkan vermək, eləcə də, təchizat zəncirində innovasiyalara imkan yaratmaq potensialına malik olur.
Fikrimcə, biz artıq maliyyə nazirliklərinin dövlət satınalmalarında oynaya biləcəyi rola dair çox geniş təsəvvürə malikik. AİB artıq təşəbbüs irəli sürüb və biz bu təşəbbüs çərçivəsində fəaliyyətimizi iqlim sahəsində fəaliyyət üzrə maliyyə nazirlərinin qlobal koalisiyası ilə razılaşdırırıq. Biz bir sıra regional şəbəkələrlə də çalışırıq, çünki bunu bu dəyişikliklərə nail olmaq üçün mühüm yanaşma hesab edirik.
Bu yaxınlarda Asiya-Sakit Okean regionu üzrə iqlim dəyişikliyinə dayanıqlılığın təmin olunması üçün maliyyə mexanizmini işə saldıq. Bu, maliyyə nazirliklərinin aşağı tullantı səviyyəsinə malik və iqlim dəyişikliyinə dayanıqlı inkişafın maliyyələşdirmənin genişləndirilməsi və razılaşdırılması üzrə potensialını möhkəmləndirməyə yönəlib.
Bu yaxınlarda Cənub-Şərqi Asiya Ölkələri Assosiasiyasının (ASEAN) Maliyyə Nazirləri Assosiasiyası ilə konkret siyasi saziş imzaladıq və bu prosesin digər regionlara, o cümlədən, Mərkəzi-Qərbi Asiya, eləcə də, Sakit okean və Cənubi Asiya regionlarına yayılmasını səbirsizliklə gözləyirik", - deyə o əlavə edib.
Qeyd edək ki, 2-5 may tarixləri ərzində keçirilən 57-ci illik toplantının mövzusu "Gələcəyə Körpü"dür.
İdarəedicilər Şurasının ilk iclası mayın 4-də baş tutacaq. Bununla illik toplantının rəsmi başlanğıcının açılışı olacaq. Bu, ev sahibi ölkədən fəxri qonaqların iştirak etdiyi tədbirdir. AİB prezidenti Masatsuqu Asakava və Gürcüstanın maliyyə naziri, eləcə də, AİB Rəhbərlər Şurasının sədri Laşa Xutişvili bəyanatlarla çıxış edəcəklər.
İllik toplantı AİB-in İdarəedicilərinə Asiya-Sakit Okean regionunun üzləşdiyi inkişaf məsələləri və çağırışları nəzərdən keçirmək imkanı verir. Görüşdə mütəmadi olaraq bir neçə min iştirakçı, o cümlədən, maliyyə nazirləri, mərkəzi bankların rəhbərləri, yüksək vəzifəli dövlət rəsmiləri, özəl sektorun nümayəndələri, beynəlxalq və vətəndaş cəmiyyəti təşkilatlarının nümayəndələri, gənclər, elm və media nümayəndələri iştirak edir.