Qarşıdakı dövr üçün əsas məqsəd əldə edilmiş nailiyyətləri möhkəmləndirməklə yanaşı, iqlim dəyişiklikləri, rəqəmsal transformasiya, inklüziv artım və iqtisadi dayanıqlılıq kimi qlobal çağırışlara çevik və effektiv cavab verən tərəfdaşlıq modelini daha da inkişaf etdirməkdir.

Bunu iqtisadiyyat nazirinin müavini Anar Axundov BMT-nin Davamlı İnkişaf üzrə Əməkdaşlıq Çərçivəsinin Yüksək Səviyyəli Birgə Rəhbər Komitəsinin iclasında çıxışı zamanı deyib.

Nazir müavininin sözlərinə görə, Azərbaycan–BMT əməkdaşlığında yeni mərhələ: 2026–2030 prioritetləri Azərbaycanın Birləşmiş Millətlər Təşkilatı ilə əməkdaşlığı çərçivəsində 2026–2030-cu illəri əhatə edən yeni Çərçivə Sənədi inklüziv sosial-iqtisadi inkişaf və insan kapitalının gücləndirilməsini, həmçinin ekosistemlərin qorunması, iqlimə davamlılıq və “yaşıl artım”ı təşviq edir.

“Bu prioritetlər bütün vətəndaşlar üçün keyfiyyətli xidmətlərə çıxışın genişləndirilməsinə, layiqli məşğulluğun təmin edilməsinə, innovasiya və sahibkarlığın inkişafına, resurslardan səmərəli istifadəyə və ətraf mühitin qorunmasına xidmət edir. Sənəddə strateji istiqamətlər üzrə konkret statistik hədəflər də müəyyənləşdirilib. Birinci strateji prioritet – inklüziv sosial-iqtisadi artım və insan kapitalının gücləndirilməsi çərçivəsində kənd təsərrüfatına yönəlmiş dövlət xərclərinin indeksinin artırılması, qeyri-infeksion xəstəliklərdən vaxtından əvvəl ölüm səviyyəsinin azaldılması, qadınların idarəetmə vəzifələrində iştirakının və sosial müdafiə əhatəsinin genişləndirilməsi, həmçinin əmək haqqının ÜDM-də payının yüksəldilməsi nəzərdə tutulur. İkinci strateji prioritet – ekosistemlərin qorunması və yaşıl artım istiqamətində isə inteqrə olunmuş su ehtiyatlarının idarə olunması, bərpaolunan enerjinin ümumi enerji istehlakında payının artırılması, tullantıların təkrar emal səviyyəsinin yüksəldilməsi və meşə örtüyünün genişləndirilməsi əsas hədəflər sırasındadır. Bu göstəricilər Azərbaycanın dayanıqlı inkişaf və yaşıl iqtisadiyyat sahəsində əldə etməyi planlaşdırdığı konkret nəticələri əks etdirir”, - deyə nazir müavini vurğulayıb.

Anar Axundov əlavə edib ki, yeni çərçivə sənədinin ümumi maliyyə həcmi 85,3 milyon dollar təşkil edir: “Bunun 51 milyon dolları artıq mövcud resurslar hesabına təmin olunub, qalan 34 milyon dolların isə növbəti beş il ərzində cəlb edilməsi planlaşdırılır”.