Moskva Millətlər Evində kəlağayı ənənəvi sənəti və simvolikasının UNESCO-nun Qeyri-Maddi Mədəni İrs Reprezentativ Siyahısına daxil edilməsinin 10 illiyinə həsr olunmuş “Qədim Azərbaycan adət-ənənələrinin dirçəlişi - Kəlağayı yaylığı” adlı təntənəli ədəbi-musiqili tədbir keçirilib.
Qonaqları Moskva Azərbaycanlılarının Milli-Mədəni Muxtariyyətinin (MMM) sədri Bəxtiyar Həsənov, sədr müavini Həşim Əliyev salamlayıblar. Qeyd edilib ki, 2014-cü ildə Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın təşəbbüsü ilə kəlağayı beynəlxalq aləmdə rəğbət qazanmışdır.
Qonaqlara videobağlantı vasitəsilə Bakı Dövlət Universitetinin professoru və kafedra müdiri, kəlağayı sənətinin bütün dünyada tanınmış mütəxəssisi və təbliğatçısı, həmçinin “Kəlağayı” kitabının müəllifi Rəna İbrahimbəyova qoşulub. Qonaqlar maraqlı faktlarla zəngin videomühazirə ilə tanış olublar.
Tədbirin təşəbbüskarı kimi Moskva Azərbaycanlılarının MMM Qadınlar Birliyinin rəhbəri Leyla Fərəcova çıxış edib və bu unikal yaylıq haqqında hekayəni tamamlayan, dizayn işlərini və məhsulun geyilmə yollarını göstərən, Şəkidən qonaq rəssam və dizayner Cəmilə Hacısəmədzadəni səhnəyə dəvət edib.
Sazın müşayiəti ilə Azərbaycan xalq mahnılarının ifaçısı Təranə Gədəbəyli, Leyla Yusifova, Gülnur Alışeva, Moskva Dövlət Beynəlxalq Münasibətlər İnstitutunun dosenti, türkmən dili müəllimi Maya Klıçyova, şair-tərcüməçi Afaq Şıxlı öz məharətlərini nümayiş etdiriblər.
Bəxtiyar Həsənov “Qadın ipək baş geyiminin istehsalı və daşınmasının ənənəvi mədəniyyəti və onun simvolikası” müsabiqəsinin qalibləri olan Qadınlar Birliyinin üzvlərinə diplomları təqdim edib.
Tədbirdə həmçinin Azərbaycanın kəlağayı, suvenirlər və dekorativ sənət nümunələrindən ibarət sərgi də təşkil olunub. Ənənəvi Azərbaycan yaylıqlarının nümayiş etdirildiyi moda nümayişi keçirilib.