Azərbaycan Dövlət Milli Gənc Tamaşaçılar Teatrında Sumqayıt Dövlət Dram Teatrının “Xeyir xəbər” tamaşası təqdim olunub.
Teatrdan bildirilib ki, səhnə əsəri Əməkdar incəsənət xadimi, yazıçı-dramaturq Əli Əmirlinin pyesi əsasında gənc rejissor Fuad Cavadzadənin quruluşunda hazırlanıb.
Mədəniyyət Nazirliyinin dəstəyi ilə gənclərin yenilikçi baxış bucaqlarının müstəqil olaraq səhnədə öz həllini tapa bilməsi məqsədilə reallaşan tamaşa 44 günlük Vətən müharibəsində əldə etdiyimiz Qələbəyə, şəhidlərimiz, veteranlarımız və qazilərimizə ithaf olunub.
Birhissəli qəhrəmanlıq dramının bədii rəhbəri Xalq artisti, Sumqayıt Dövlət Dram Teatrının baş rejissor Firudin Məhərrəmov, quruluşçu rejissoru Fuad Cavadzadə, quruluşçu rəssamı Nizami Dadaşev, musiqi tərtibatçısı sənətşünaslıq üzrə fəlsəfə doktoru Telman Qəniyev, qrafika işləri isə Sahil Nəzərova məxsusdur.
“Xeyir xəbər”də rolları Əməkdar artist Elmira Kərimova, aktyorlar Habil Xanlarov, Şəmistan Süleymanlı, Məryəm Hüseynli, Elay Xasıyev, Siyavuş Mahmudov, Akif Mirzəyev, Kamran Muradlı, Ramazan Xanlarov, Etibar Əmirov, Əmrah Cəbiyev canlandırıblar.