Bir çox oxucu daima bu kitabı harada tapmaq mümkün olduğunu soruşurdu. Hətta ədəbi birlikdə də onu əldə etməyə çalışıblar, lakin sovet dövründə nəşr edilən kitabı tapmaq demək olar ki, mümkünsüz oldu.
Bu barədə Azərbaycanın Xalq yazıçısı Natiq Rəsulzadə Bakıdakı Rus evində keçirilən yeni kitabın, dilogiya – “Gecədə atlı” povestinin və “Poker oyunu” romanının təqdimat mərasimində bildirib.
Kitabın ilk əsəri yazıçının 1981-ci ildə yaratdığı və oxucuların geniş rəğbətini və məhəbbətini qazanmış məşhur “Gecədə atlı” povestidir. İkincisi, povestin davamı, 2024-cü ildə yazılmış “Poker oyunu” romanıdır. Burada müəllif otuz ildən sonra baş verən hadisələrdən, qəhrəmanının taleyindən, çətin sınaqlardan keçdiyi, lakin yıxılmadığı və məqsədinə çatdığı ömür yolundan bəhs edir.
Natiq Rəsulzadə Azərbaycanın Xalq yazıçısı, Qorki adına Ədəbiyyat İnstitutunun məzunu, nasir, dramaturq, ssenarist, Əməkdar incəsənət xadimi, “Şöhrət” ordenli, bir çox yerli və xarici ədəbi mükafatlar laureatı, Bakı, Moskva və Avropa ölkələrində nəşr olunmuş əllidən çox kitabın, çoxsaylı povest, hekayə, ssenari və pyeslərin müəllifidir.
O deyib ki, illər sonra oxucular kitabın tarixçəsinə, qəhrəmanın taleyinə maraq göstərməkdə davam ediblər. Məhz bu, müəllifi kitabı davam etdirmək barədə düşünməyə vadar edib.
“Zaman keçdikcə düşünməyə başladım: o kitabdakı baş qəhrəmanın taleyi yarımçıq qaldı, ən həyəcanlı anda kəsildi. Bu, xüsusi olaraq edilib ki, oxucular personajla daha dərindən empatiya qura bilsinlər, onun taleyi haqqında düşünsünlər və bunun necə baş verdiyini təsəvvür etsinlər. Məhz oxucuların sönməz marağı məni əsərin davamını yaratmağa vadar etdi”, - deyə yazıçı qeyd edib.
Müəllifin dediyinə görə, o, bu yaxınlarda yeni kitab üzərində işləməyə başlayıb və birdən dərk edib ki, elə həmin hekayənin davamını yazır.
“Təxminən 30-40 səhifə yazdım və birdən başa düşdüm ki, bu, hələ 1981-ci ildə hekayəsi yarımçıq qalmış bir qəhrəmanın həyatının davamıdır. Ötən illər ərzində onun həyatı əsaslı olaraq dəyişdi və o, tamam başqa bir yol tutdu. Bilirsiniz, bunun davamı məni o qədər cəlb etdi ki, kitab nəşr etmək qərarına gəldim”, - deyə o əlavə edib.
Natiq Rəsulzadə onu da bildirib ki, o, əsərlərində çox vaxt şəxsiyyətinin bir hissəsini personajlarda canlandırır.
“Qəhrəmanlarımın çoxu ilə prinsiplərim və həyata baxışlarım üst-üstə düşür. Müəllif personaj yaradarkən hər zaman öz ruhunun bir hissəsini ona ötürür: xarakter, düşüncələr, hərəkətlər, həyata baxış. Lakin bu, təkcə baş qəhrəmana aid deyil - ikinci dərəcəli personajlar da ətrafımdakı insanların xüsusiyyətlərini mənimsəyiblər. Deyə bilərəm ki, mən öz tanışlarım, onların həyat və taleləri ilə bağlı müşahidələrimdən ilham almışam”, - deyə Xalq yazıçısı yekunlaşdırıb.