8 noyabr 2025-ci il — 44 günlük Vətən müharibəsində qazanılmış tarixi Qələbənin 5 illiyinə həsr olunmuş “Zəfərə gedən yol” adlı V Respublika rəsm və əl işləri müsabiqə-sərgisi Milli Azərbaycan Tarixi Muzeyində keçirilib.
Sərgidə istedadlı və yaradıcılıq qabiliyyəti olan uşaqların və gənclərin Vətən müharibəsinə, Müzəffər Ordumuzun qəhrəmanlığına, azad edilmiş Qarabağ torpaqlarına, o cümlədən Şuşa şəhərinə həsr olunmuş 70-dən çox rəsm əsəri və əl işi nümayiş etdirilib. Müsabiqə-sərginin kuratoru muzeyin əməkdaşı Aynur Babayevadır.
Layihənin məqsədi gənclərdə vətənpərvərlik ruhunu möhkəmləndirmək, onların istedad və yaradıcılıq bacarıqlarını üzə çıxarmaq, həmçinin ictimaiyyətə təqdim etməkdən ibarətdir.
Tədbir Azərbaycan Respublikasının Dövlət Himninin səsləndirilməsi və şəhidlərimizin əziz xatirəsinin bir dəqiqəlik sükutla yad olunması ilə başlayıb. Daha sonra Muzeyin İnnovasiyalar və təhsil proqramları şöbəsinin müdiri Fəridə Şəmsi çıxış edərək iştirakçıları salamlayıb, muzeydə yaradılmış Vətən müharibəsi fondu və tədbirin əhəmiyyəti barədə məlumat verib.
Tədbirdə həmçinin Vətən müharibəsi şəhidi Xudayar Yusifzadənin anası Radə Qurbanova da çıxış edib. O, şəhid övladlarının və gənc nəslin vətənpərvərlik ruhunda tərbiyə olunmasının vacibliyini vurğulayaraq, belə tədbirlərin keçirilməsinə görə Milli Azərbaycan Tarixi Muzeyinin rəhbərliyinə təşəkkürünü bildirib.
Münsiflər heyətinin tərkibinə Azərbaycan Milli İncəsənət Muzeyinin bərpaçı-rəssamı, əməkdar rəssam Natiq Səfərov, C.Cabbarlı adına Azərbaycan Dövlət Teatr Muzeyinin direktor müavini, Rəssamlar İttifaqının üzvü Nazim Məmmədov, sənətşünaslıq üzrə fəlsəfə doktoru, dosent Samir Sadiqov və Milli Azərbaycan Tarixi Muzeyinin Təsviri materiallar fondunun müdiri, memarlıq üzrə fəlsəfə doktoru Nardanə Yusifova daxil olub.
Münsiflər heyəti sərgidə təqdim olunan əsərləri yüksək qiymətləndirib, mövzunun aktuallığını və layihənin gənc istedadların inkişafında oynadığı rolu vurğulayıb.
Kurator Aynur Babayeva çıxışında qeyd edib ki, bu müsabiqə 2021-ci ildən etibarən keçirilir və artıq beşinci ildir ki, ənənəvi şəkildə təşkil olunur. Əsərlər peşəkar incəsənət xadimlərinin iştirakı ilə qiymətləndirilir, qaliblər seçilərək mükafatlandırılır.
Tədbirin sonunda qaliblər elan olunub və Fəxri Fərmanlarla təltif ediliblər. Bütün iştirakçılara sertifikatlar təqdim olunub.
Qaliblər aşağıdakılardır:
• I yer – Suel Babazadə (7 yaş, AMK-nın nəzdində İncəsənət Gimnaziyası)
• II yer – Nəzrin Əliyeva (16 yaş, AMK-nın nəzdində İncəsənət Gimnaziyası)
• III yer – Əsra Əlizadə (AMK-nın nəzdində İncəsənət Gimnaziyası)

Tədbir Zəfər Gününə həsr olunmuş musiqi ifaları ilə yekunlaşıb.

Sərgidə AMK-nın nəzdində İncəsənət Gimnaziyasının şagirdləri, Sumqayıt şəhəri 2 nömrəli Uşaq-Gənclər İnkişaf Mərkəzinin üzvləri, gənc rəssamlar, incəsənət xadimləri, muzey əməkdaşları və media nümayəndələri iştirak ediblər.