Türkiyə Respublikası ilə sərhəddə yerləşən Naxçıvan Baş Gömrük İdarəsinin “Sədərək” gömrük postunun yaxınlığındakı TIR parkında əsaslı yenidənqurma işləri aparılıb.

DGK-nın Mətbuat və İctimaiyyətlə Əlaqələr İdarəsindən bildirilib ki, TIR park nəqliyyat vasitələrinin dövlət sərhədindən keçidinin intensivliyinin artırılmasına, nəqliyyat axınının idarə olunmasına, sərhədkeçmə proseslərinin səmərəli təşkilinə xidmət edir.

“Sədərək” dövlət sərhədindəki buraxılış məntəqəsi ölkəmizdən keçən dəhlizlərin önəmli komponentlərindən biridir və nəqliyyat vasitələrinin sürətli keçidini təmin etmək məqsədilə gələcəkdə məntəqədəki əməliyyatların bir hissəsinin TIR parkda aparılması planlaşdırılır.

7,34 hektar sahəni əhatə edən TIR parkın ərazisinə asfalt örtüyü çəkilib, xətləmə işləri aparılıb, yeni işıqlandırma dirəkləri quraşdırılıb. Su-kanalizasiya, elektrik xətləri, istilik və havalandırma sistemləri yenilənib. Proseslərin real vaxt rejimində izlənilməsi, təhlükəsizliyin gücləndirilməsi məqsədilə onlayn müşahidə sistemləri quraşıdırılıb.

Parka daxil olan sürücülərə nəqliyyat vasitəsindən enmədən onlayn növbə sistemi vasitəsilə qeydiyyatdan keçmək imkanı yaradılıb, həmçinin ixrac yüklərinin çəkisini müəyyənləşdirmək məqsədilə tərəzinin quraşdırılması nəzərdə tutulub.Ərazidə yanğın təhlükəsizliyinin təmin edilməsi məqsədilə yanğın su anbarı tikilib.

Gələcəkdə gömrük ödənişlərinin alınması üçün bank xidmətinin yaradılması da nəzərdə tutulur.

Yükə baxışın keçirilməsi məqsədilə yük platforması və ixrac yüklərinin qeydiyyatını aparmaq üçün xidməti otaqlar istifadəyə verilib. Xidməti binada əsaslı təmirdən sonra sürücülər üçün nəzərdə tutulan zəruri infrastruktur yararlı vəziyyətə gətirilib.

Yenilənmiş TIR parkının istifadəyə verilməsi yük daşımalarının vaxtında icrası, nəqliyyat vasitələrinin gözləmə müddətinin azaldılması və xidmət keyfiyyətinin artırılması ilə yanaşı, ölkəmizin tranzit potensialının gücləndirilməsi, beynəlxalq yükdaşımalarında rəqabət qabiliyyətinin yüksəldilməsi və logistika xidmətlərinin daha səmərəli təşkili baxımından da mühüm əhəmiyyət daşıyır.