Türkiyə və Azərbaycan texnologiya sektorunda rəqabət qabiliyyətini artırmaq üçün birgə ekosistem formalaşdırmalı və miqyas üstünlüyü yaratmalıdır.

Bu fikirləri Türk İnformasiya Texnologiyaları Sənayeçiləri Assosiasiyasının (TÜBİSAD) İdarə Heyətinin sədri Mehmet Ali Tombalak Azərbaycan–Türkiyə İKT Biznes Forumunda çıxışı zamanı səsləndirib.

Mehmet Ali Tombalak bildirib ki, hazırda Türkiyədə informasiya və kommunikasiya texnologiyaları sektorunun ümumi həcmi 33 milyard dollar təşkil edir və TÜBİSAD ölkə bazarının 95 faizini təmsil edir.

“Məqsəd Azərbaycanla birgə əməkdaşlıq çərçivəsində bu həcmi ikiqat artırmaqdır. Türkiyə təkcə öz bazarı ilə deyil, Türk dövlətləri ilə birlikdə 161 milyonluq əhaliyə xidmət potensialına malikdir. Bu isə texnologiya sektorunda rəqabət üstünlüyü baxımından strateji əhəmiyyət daşıyır”, - deyə TÜBİSAD sədri vurğulayıb.

Mehmet Ali Tombalak bildirib ki, 37,8 milyon əhalisi olan Polşa texnologiya ixracını 37,5 milyard dollara çatdırıb ki, bunun 14,5 milyard dollarını IT xidmətləri təşkil edir: “Türkiyənin IT xidmətləri ixracı təxminən isə 3,5 milyard dollar səviyyəsindədir. Çin 3,7 trilyon dollar, Hindistan isə 200 milyard dollardan çox IT xidmətləri ixrac edir və bu ölkələrin əsas üstünlüyü böyük bazardır. Bu baxımdan, Türkiyə və Azərbaycanın texnologiya sahəsində birləşməsi və ortaq ekosistem qurması zəruridir. Ayrı-ayrılıqda deyil, birlikdə böyüməliyik”.

Mehmet Ali Tombalak əlavə edib ki, forum çərçivəsində aparılan müzakirələr təkcə əməkdaşlıq deyil, həm də şirkətlərin birləşməsi və regional səviyyədə daha güclü strukturun formalaşdırılması istiqamətində imkanlar yaradır.