Ukrayna nadir torpaq metalları ilə bağlı razılaşmadan sonra ABŞ-la İnvestisiya Fondu ilə bağlı daha bir saziş imzalamağı planlaşdırır.
Bunu Ukrayna Prezidenti Volodimir Zelenski brifinqdə bəyan edib.
“Növbəti saziş daha ciddi və çətin olacaq, fondla bağlı sövdələşmə planlaşdırılıb. Orada tərəfdaşlıq münasibətləri, maliyyə və digər məsələlər dəqiqləşdiriləcək. Saziş Ukrayna parlamentində mütləq təsdiqlənməlidir. ABŞ Konqresi ilə bağlı xəbərim yoxdur”, - deyə Prezident vurğulayıb.
Onun sözlərinə görə, ABŞ və Ukrayna arasında imzalanması planlaşdırılan nadir metallarla bağlı saziş gəlirin 50 faizinin kompensasiya edilməsini nəzərdə tutur. Ukrayna lisenziya məsələsini də həll etməli və audit keçirməlidir.
Zelenski əlavə edib ki, sazişin son variantı müsbət dəyərləndirilib. Onun qaldırdığı əsas məsələlər sənədin mətnində lazımi qaydada öz əksini tapıb.
“Mənim üçün vacib olan bizim borclu olmamağımızdır, sazişdə də nə 500, nə 350, nə də 100 milyard dollarlıq borc qeyd olunub. Bu, bizə qarşı ədalətsizlik olardı”, - deyə Zelenski qeyd edib.
Prezident, həmçinin bildirib ki, fondla bağlı məsələ çərçivə sövdələşməsi daxilində həll edilib. O vurğulayıb ki, bu, Ukraynanın maraqlarının nəzərə alındığı tərəfdaşlıq layihəsidir.
“Bu, tək Amerika deyil, Ukrayna-Amerika birgə fondudur”, - deyə o söyləyib və əməkdaşlığa görə ABŞ-a təşəkkür edib.
Bu gün isə Ukrayna Baş naziri Denis Şmıqal bildirib ki, faydalı nadir tapıntılarla bağlı sazişin son variantı faktiki olaraq yekunlaşıb. Sövdələşmə “Ukraynanın Bərpası İnvestisiya Fondunun qayda və şərtlərinin müəyyən edilməsi haqqında Saziş” adlanır.